Сүсэгтэн олонд толилуулах нь

XYII жарны “Илжиг” хэмээгч Төмөр туулай жилийн Шинийн гурван буюу 2011 оны 2 сарын 6-ны Ням гаригт 10 цагаас Ажиа Рэнбүүчи Гэгээнтэн Гүнбүм Чамцэлин хийдийн лам хуврагуудын хамт сүсэгтэн олондоо гарч буй жилдээ аз хиймортой, элэг бүтэн, эрүүл энх, үйл бүтэмжтэй байхыг билэгдэн “Богд Зонховын 1000 тахил өргөх ном” айлдах гэж байна.

Хурал номын үеэр Та бүхэн лянхуа цэцгээс төрөгч, тарнийн хаан хэмээгдэгч Ловон Бадма Жунай Бурханыг шүрээр хэлхэн бүтээх үйлийг даган үйлдэж буян хураах нийц тохионо.

Энэ Бурханы Зүрхэн тарни “Умаа хум базар гүр бадма сэдий хум” нь, аливаа гай түйтгэр, өвчин зовлонгоос гэтэлгэж, цаг бусын гал усны аюул, осол гэмтлээс аврах билгийн хүчийг агуулдаг гэдэг билээ.

Мөн энэ бэлгэт сайн өдөр Дашчойлин хийдийн оточ лам, уламжлалт анагаах ухааны эмч Ч.Батнайрамдал судсаар оношилж, эм тан хүртээнэ.

Хурал номын дараа Сүсэгтэн олонд даллагын идээ түгээнэ.

Та бүхнийг энэ өдрийн хурал ном, буяны үйлст даган баясаж, хамтран оролцохыг урьж байна.

Ном хурах газрын хаяг: Casa Royale Banquets 783 Lee St, Des Plaines, IL 60016
Хурал номын талаарх бусад мэдээллийг Өнөрцэцэгээс (773-715-6334) авна уу.

Ум сайн амгалан болтугай.
Төвд Монголын Шашин Соёлын Төв

Ловон Бадма Жунай бурханы тухай

Намо Гүрү Бадмасамбаваяа

Монголчууд бид бүхэнд Ловон Бадамжунай (Үржин Ринбүчи, Бадмасамбава, Ловон багш, Лянхуа цэцгээс төрөгч) зэрэг олон янзаар нэрлэгддэг Бадамжунай бурхан анх наймдугаар зуунд Энэтхэгээс эхлэн Төвд зэрэг бусад хөрш улсуудад Бурханы шашны Очирт хөлгөнийг түгээжээ. Түүнийг Нууц Тарнийн хаан, хоёрдугаар Будда хэмээн өргөмжилдөг бөгөөд Бадамжунай бурханы цадигт Индрабоди хаан гадаад далайд эрдэнэ авахаар явж байгаад далайн тив нэгнээ лянхуан гол мод элдэв зүйлээр өнгө төгөлдөр ургасны дээр, найман нас хүрсний чинээ бяцхан хөвгүүн, үзвээс гоо билгэ хийгээд лагшингаар чимсэн гартаа очир хийгээд бадам цэцэг барьсан байхыг үзээд маш гайхамшиг төрж, хаан бээр тэр бяцхан хөвгүүнд өгүүлрүүн:

Бяцхан хөвгүүн минь ээ? Чиний эцэг хэн бэ? Эх хэн бэ? Язгуур чинь юу вэ? Орон чинь хаа вэ? Идээ юуг иддэг вэ? Энд юу хийж оршино вэ? хэмээн асуусанд хөвгүүн:

Миний эцэг өөрийг ухагч бэлгэ мөн. Эх минь номын төв Самандабадра эх болой. Язгуур минь төв хийгээд ухаан хоёр үгүйд багтсан болой. Орон нутаг минь хоосон чанар төрөл үгүйд тогтюу. Идээний хувь минь хоёр үзэгдэлт атгагыг идэж, энд болбоос нисваанисыг нядлахын явдлыг үйлдэнэ. хэмээн өгүүлсэнд хааны сэтгэлд гайхамшиг төрж энэ нь нэгэн хувилгааны бие буй хэмээн санаж би өөрийн үр хийгээд тахилын орон болгосугай хэмээн хаан гараа торгоор боож хөвгүүнийг авав. Тэрээр лянхуан голыг тасалж хөвгүүн лүгээ сэлтийг аваачиж, мөнхүү өөрийн орондоо буцан харьж ирэв гэсэн байдаг.

Анх Энэтхэгээс Төвдөд Бурханы шашин нэвтрүүлэх үед хүчирхэг байсан мөргөлийн лус савдагууд эсэргүүцэж, баригдаж буй хийд, сүмийг нураагаад байж. Тэр үед хоёрдугаар Будда Бадамжунайг залж авчран, тэдгээр лус савдгийг номхотгон шашныг сахигч сахиуснууд болгосон гэдэг домогтой ба Төвдийн анхны хийд Самаяаг байгуулалцаж явсан түүхтэй ажээ. Мандарва, Иш Цожэл зэрэг дагинастай үхэшгүй насны шид бясалгаж, олон догшин тэнгэр, найман аймгийг номд оруулсан. Мөн олон тооны бүтээл бясалгал үйлдэж, ирээдүйн муу цагт амьтанд туслах тарни уншлага олныг нуув. Бадамжунай бурхан мөн Очирт хөлгөний ёсыг үндэслэж, Их Төгсгөл буюу Зогчэнг Төвдөд айлдав. Шидийг олсон шавь хорин тав байсан ба Төвдөөс явахдаа шавь тус бүртээ нэг нэг атга элс өгч, Намайг санавал энэ атга элсэнд залбирч бай. Надтай хамт байгаагаас ялгаагүй гэж зарлигласан ба одоо Гандан хийдэд буй их шүтээн Очирдара бурханы шүншигт уг элсгээс орсон гэдэг. Бас тухайн үед насны хэмжээ болоод байсан Төвдийн хаан Тисрэндэцон хааны насыг арван гурван жилээр уртасгаж, шашин амьтны бусыг зохиов.

Ийнхүү ертөнцийн хүмүүст үл айхын өглөг өгөхийн тулд баруун урд зүгт мангасын амыг хаахаар нарын гэрэл хөлөглөн одсон түүхтэй.

Энэ бурханы зүрхэн тарни нь Умаа хум базар гүрү бадма сэдий хум болой.

Нийт сэтгэгдэл (17)

RSS

Сэтгэгдэл бичих